Невил го критикуваше Вирц: Против Сити изгледаше како мало дете

Атмосферата на Енфилд е на прагот на вриење откако Ливерпул се соочи со тежок пораз од Манчестер Сити, а предмет на критики од страна на англиската јавност е германскиот играч за врска, Флоријан Вирц. Ливерпул минува низ една од најпредизвикувачките кризни фази во последниве години, со пет порази во единаесет кола од Премиер лигата и седум во последните десет официјални натпревари, а убедливата победа на Сити од 3:0 само ги продлабочи проблемите.

Тимот на тренерот Арне Слот на „Етихад“ изгледаше беспомошно, кога голови постигнаа Ерлинг Халанд, Нико Гонзалез и Џереми Доку. Меѓутоа, освен самиот резултат, во Англија најмногу се дискутира за играта на Флоријан Вирц. Офанзивниот играч за врска, кој летоска пристигна од Баер Леверкузен за 125 милиони евра, сè уште не успева да се адаптира на темпото на Премиер лигата. Во единаесет натпревари сè уште чека на својот прв гол или асистенција, а неговиот настап против Сити предизвика аларм.

Најостра критика пристигна од легендарниот Гери Невил, стручен аналитичар на Скај Спортс. “Вирц е проблем. Да бидеме искрени: тој е проблем. Вреден е повеќе од 120 милиони евра, а на теренот изгледаше како мало дете”, изјави Невил.

Поранешниот играч на Манчестер Јунајтед додаде дека трпението полека исчезнува. “Постапувавме со него внимателно, разбирајќи дека доаѓа во нова земја и различна лига, но ова не може да продолжи. Има квалитет, технички е фантастичен, но денеска беше надминат физички и ментално. Тоа е загрижувачки.”

Невил исто така истакна дека целокупниот тим изгледа ранливо: “Ливерпул изгледаше како тим кој е лесно да се победи. Недостасуваше интензитет, недостасуваше енергија. Некои играчи изгледаа меко, а Вирц беше најочигледен пример за тоа.”