Синер и Алкараз се договорија за егзибициски меч во Азија

Првиот светски тенисер Јаник Синер од Италија и неговиот шпански соперник Карлос Алкараз ќе одиграат егзибициски меч во Јужна Кореја во јануари, непосредно пред Отвореното првенство на Австралија, првиот Гренд Слем турнир во сезоната 2026, соопштија организаторите во понеделникот.

Овој меч, додаден на распоредот што играчите – вклучувајќи го и Алкараз – веќе го сметаат за пренатрупан и предолг, ќе се одржи на 10 јануари во Инчеон, близу Сеул, додека Отвореното првенство на Австралија, на кое Синер го брани трофејот, почнува на 18 јануари во Мелбурн.

„За корејските љубители на тенисот, ова ќе биде прва шанса да ги видат двајцата најдобри играчи како се судираат,” објави корејскиот производител на автомобили Хјундаи, спонзор на настанот. Синер, благодарение на победата на Париз Мастерс во неделата, го презеде првото место на АТП ранг-листата од Алкараз.