„Бомба“ на Ибраими во победата на Шкендија над Силекс (Видео)

Екипата на Шкендија ја продолжи победничката серија и во денешното дерби против Силекс, славејќи со 2-0. Уште еднаш клучен човек за триумфот на тетовци беше искусниот Бесарт Ибраими.

Првото полувреме не донесе премногу возбудувања – голема борба на средината од теренот и малку вистински шанси пред двата гола. Но, продолжението мина во поинаков ритам. Во 50. минута Ибраими со прецизен и силен удар ја затресе мрежата и ја отвори победата на Шкендија. Силекс се обиде да се врати, создаде неколку прилики, но не успеа да погоди, а тоа го плати во завршните моменти кога Красничи со гол стави печат за конечни 2-0.

Во вториот натпревар, Работнички и Брера одиграа натпревар со многу голови. Струмичани доминираа во првиот дел и поведоа со 1-3. Во второто полувреме „романтичарите“ се вратија во игра со два гола, но одбраната пак попушти и дуелот заврши со 3-4 во корист на гостите.

Со оваа победа, Шкендија барем привремено го зазеде врвот на табелата, очекувајќи ги резултатите на Вардар и Струга. Силекс остана на четвртата позиција, Работнички со само четири освоени бода продолжува да се мачи на дното, а Брера со 11 бодови е сигурно позициониран во средината.