Грилиш се сели во Ливерпул?!

Крилниот напаѓач на Манчестер Сити, Џек Грилиш, повеќе не е во прв план кај менаџерот Пеп Гвардиола и се подготвува „плодна почва“ за тој летово да го напушти тимот.

Евертон се обратил до Сити за можен трансфер на Грилиш, открива „ESPN“ од извори блиски до клубовите.

Разговорите меѓу двата тима се во тек, Евертон предложил едногодишна позајмица, а потоа откуп, додека Сити преферира директен трансфер веднаш, но не ја исклучува и можноста за привремено решение.

Грилиш, кого Сити го купи за 100.000.000 фунти кога во 2021 година пристигна од Астон Вила, има уште две години од договорот на „Етихад“.

Овој 29-годишен фудбалер е изоставен од тимот за Светското клупско првенство, откако му беше кажано дека следната сезона ќе му биде тешко да добива шанси за играње.

Минатата недела повторно тренираше со првиот тим и беше дел од групата што учествуваше на отворениот тренинг за медиуми, но тоа не го промени неговиот статус.

Менаџерот на Евертон, Дејвид Мојес, неодамна изрази големо незадоволство од направеното во преодниот рок, беше прилично остар кон раководството на клубот, а тие очигледно го сфатија сериозно и започнаа да му обезбедат големо засилување во ликот на Грилиш.