Битка помеѓу Њукасл и Ливерпул: Трансфер од 100 милиони евра може да доведе до уште поголем договор!

Актуелниот англиски шампион Ливерпул, иако веќе инвестираше 212 милиони евра ова лето за засилувања, продолжува да биде активен на фудбалскиот пазар. Британските медиуми објавија дека “Црвените” го имаат во фокусот Хуго Екитике (23), напаѓачот на Ајнтрахт Франкфурт. Сепак, конкуренцијата за неговиот потпис е жестока, бидејќи и Њукасл е во игра. “Сврчките” понудија рекордни 80 милиони евра, но германскиот клуб ја отфрли оваа понуда.

Екитике има договор со Ајнтрахт до јуни 2029 година, а клубот од Франкфурт бара обештетување од 100 милиони евра. Ливерпул, кој веќе го донесе играчот од средината на теренот Флориан Виртц и бочните одбранбеници Милош Керкез и Џереми Фримпонг, според неофицијални информации, е спремен да ја плати оваа огромна сума, но ќе мора да се бори со Њукасл за потписот на извонредниот напаѓач.

Тренерот на Њукасл, Еди Хау, е во потрага по засилување и конкуренција за Александер Исак. Тие два пати неуспешно се обидоа да го доведат Екитике во текот на 2022 година. Минатата сезона, францускиот играч постигна 22 гола и запиша 12 асистенции.

Во меѓувреме, Ливерпул подолго време ја следи ситуацијата со Исак (25), споменатиот напаѓач на Њукасл. Минатата сезона, шведскиот фудбалер постигна 23 гола во Премиер лигата и според проценките на Transfermarkt вреди 120 милиони евра.

Во идеален случај, Њукасл би сакал и Исак и Екитике во истиот состав, но ако го доведат францускиот напаѓач, Ливерпул може да им одговори со обид за трансфер на Исак. Швеѓанецот, според англиските извори, би прифатил трансфер, но Њукасл не би се согласил на обештетување под 150 милиони евра.