Мереска збесна по синоќешниот прекин: Луѓе, ова не е фудбал!

Тренерот на Челси, Енцо Мереска беше жестоко револтиран поради сè што се случуваше синоќа на Светското клупско првенство.

Челси се пласираше во четвртфиналето на Светското клупско првенство откако по продолженијата ја совлада Бенфика со 4:1.

Овој натпревар сепак беше одбележан со прекин поради грмотевици и голема опасност од бура. Натпреварот започна во 16 часот според локално време, а заврши во 20:40.

Зошто во САД сите натпревари мораат да бидат прекинати?

Безбедносните протоколи во САД се многу строги и налагаат спортските настани на отворено да се прекинат доколку се појават грмотевици.

Грмотевица во радиус од 13 километри предизвикува прекин на која било спортска манифестација во најмала рака 30 минути, и тоа е причината зошто неколку натпревари веќе биле прекинати.

Особено беше лут по сето ова Енцо Мереска, кој беше разочаран како се одигра овој меч и зошто се прекина при резултат 1:0 во 86. минута од натпреварот.

„Среќен сум што победивме, но тука се случуваат работи кои јас никогаш не можам да ги разберам и прифатам”, започна Мереска и продолжи:

„Луѓе, ова е мајтап. Ова не е фудбал. Разбирам дека натпреварот се прекинува од безбедносни причини и ја поздравувам таа одлука.

Меѓутоа, тогаш ова веројатно не е вистинско место за играње фудбал. Прекинување на натпреварот на два часа никогаш не е фудбал, ниту ќе биде. Хорор“, додаде тренерот.

Фотографија: Grok AI