Анчелоти: Стресот е моето гориво

Реал Мадрид испадна од Лигата на шампионите, но остана на два домашни фронта, во лигата и во Купот на кралот каде игра финале. Меѓутоа, се почесто се зборува за потенцијална замена на тренерот Карло Анчелоти, но тие приказни особено и не го допираат.

Животот во кралскиот клуб е стресен. Денес си на врвот, омилен, најдобар, а веќе утре ако изгубиш важен натпревар, можеш да станеш бивш. Токму тоа, на некој начин, му се случува на еден од најдобрите тренери на денешницата, па и на 21. век, Карло Анчелоти.

Искусниот италијански тренер во вториот мандат во Реал за три сезони освои по два пати Примера и Лигата на шампионите. Но, неодамна испадна од Лигата на шампионите во четвртфиналето од Арсенал и веднаш почнаа да кружат приказни за евентуална смена. Според некои медиумски извештаи, тоа ќе се случело ако Реал не победеше против Атлетик Билбао, кој беше совладан со ефектен гол на Валверде во третиот минута на продолжението. Но, Анчелоти по сопствено признание е навикнат на притисок.

– Додека станувам секое утро, сè е добро. Кога успехот е блиску, кога сте блиску до освојување трофеј, нормално е стресот да се зголеми. Но, стресот е моето гориво. Колку повеќе притисок, толку сум посреќен – рече Анчелоти.

Но, Реал има многу проблеми оваа сезона, што се виде во Лигата на шампионите, а во првенството заостанува четири бода зад Барселона, со која во сабота игра финале на Купот на кралот.

– Клубот е свесен дека е покомплицирано од минатата сезона. Заедно се бориме со тешкотиите. Што се однесува до мојот статус, во фудбалот сè е можно. Ништо не може да ме изненади. Немам гнев кон никого. Го сакам овој занает откако почнав да го работам. Би сакал да продолжам што подолго е можно. Кога еден ден ќе заврши, ќе бидам благодарен и ќе се свртам кон друг клуб. Ништо повеќе.