Изненадување од Островот: Астон Вила го продава својот напаѓач за 95 милиони евра?

Фудбалскиот клуб Астон Вила, сепак, е подготвен да го продаде Џон Дуран, но само во случај на рекорден трансфер.

Новинарот на Атлетик, Дејвид Орнстајн, денес откри дека Астон Вила им соопштила на заинтересираните дека може да преговара за Дуран, но за сума од 80 милиони фунти, односно околу 95 милиони евра!

Дуран во претходните денови беше поврзуван со бројни клубови, дури имаше контакти и од Саудиска Арабија, но Колумбиецот чека понуда од Европа.

Наводно, на сцена стапил Арсенал, кој по секоја цена сака да донесе напаѓач до крајот на јануарскиот трансфер прозорец, и многу е можно да тргнат по Дуран бидејќи Александар Исак и Бенџамин Шешко се недостапни до летото.

Сепак, се спомнува дека го следи и Челси, бидејќи Николас Џексон не покажа дека може да биде единствен напаѓач и Енцо Мареска побара уште еден центарфор.

Дуран е резерва во Астон Вила, Оли Воткинс е сѐ уште незаменлив, а Унаи Емери не сака да игра со двајца напаѓачи, бидејќи тоа не е неговиот систем на игра.

Вила може ова добро да го наплати и да заработи значителна сума, бидејќи го доведе Колумбиецот од Чикаго во зимата 2023 година за 16 милиони евра.