ЕУРО анализа: Украина – Англија, патот кон финалето на Вембли отворен за англичаните

На прагот на вториот последователен полуфинален настап на голем турнир, Англија се подготвува за битка далеку од својата база на Вембли, кога во сабота ќе се сретне со Украина во четврт-финалето на ЕУРО 2020 во главниот град на Италија, Рим.

Англија во еуфорија

Англија ја потопи Германија во дербито на осминафиналната фаза. Славеа со 2:0 за да го резервираат своето место во последните осум селекции на турнирот.

Капитенот на Англија, Хари Кејн, за малку не дозволи емоциите да го надвладеат за време на неговото интервју по натпреварот во вторникот. Победата над стариот непријател Германија е како да се освои златото.

Цврстата одбрана на Англија точно демонстрираше зошто поминаа 540 минути без да примат гол. Имаа одлична игра, цврста одбрана која почнуваше од најистурените во офанзивата и одличен голман во името на Пикфорд.

Рахим Стерлинг, ја продолжи својата голгетерска форма со голот во 75-та минута, а откако Томас Милер необјасниво ја промаши големата шанса за израмнување, Кејн во 86-та минута ги постави конечните 2:0, за голема еуфорија во Лондон.

Англија со можност што не смее да ја пропушти

Ова е прв натпревар на Англија надвор од Лондон на ова Европско Првенство. Ќе биде интересно да се види како ќе изглед аоваа Англија кога не игра на свој терен. Проблем ќе биде тоа што Ангија воопшто нема да има навивачи во Рим. Имено, Италија воведе задолжителен карантин за сите кои влегуваат во земјата од Велика Британија.

Секој кој бил во Велика Британија, а сака да влезе во Италија ќе мора да оди во петдневен карантин и ќе мора да покаже негативен тест на излегувањето. Според британските мерки исто така секој кој се враќа од Италија во Британија ќе мора да оди во задолжителен карантин.

Поради овие мерки, Фудбалската асоцијација на Англија не продава билети за натпреварот со Украина.

Е сега, дополнителна мотивација за момците на Саутгејт е тоа што доколку Англија ја мине Украина, тогаш полуфиналето го игра повторно на „Вембли“ со подобриот од дуелот помеѓу Данска и Чешка. Значи Англија има отворен пат до финалето бидејќи против било која селекција од овие што и стојат на патот е голем фаворит, а финалето е токму во Лондон, на 11-ти Јули. Ова е шанса која Англија не смее да ја пропушти.

Украина и Шевченко уживаат во успехот

Украина мораше да и се заблагодари на Шведска што обезбеди пласман во осминафиналето на ЕУРО 2020, откако скандинавската екипа ја победи Полска што значеше дека Украина ќе се квалификува од нивната група како една од четирите најдобри третопласирани селекции.

Сепак, избраниците на Андриј Шевченко не беа во можност да и направат никакви услуги на Шведска, откако Олександр Зинченко го отвори резултатот пред израмнувањето на Емил Форсберг. Тоа значеше продолженија, а таму Украина го постигна вториот најдоцен гол вцо историјата на европските првенства, откако замената Артем Довбик во 120-та минута постигна гол вреден четвртфинале.

Освојувањето на само три бода од можните девет во групната фаза и тоа по тешката победа над Македонија, сигурно не значеше успех, но Шевченко одлично ја постави играта, неговите фудбалери одиграа неверојатен меч и сосема заслужено закажаа дуел со Англија во Рим.

Беа аутсајдери против Шведска, а истата улога ја имаат и сега, но Шевченко најавува дека без страв ќе излезат на терен против Англија и ќе се надеваат на уште едно мало чудо.