Швајцарија за три натпревари во групата и осминафиналето прелетала 12.000 километри, Англија нула

Денес со осминафиналните натпревари стартува нокаут фазата на Европското првенство кое е посебно по неколку нешта, а едно од нив е дека се игра во различни држави.

Репрезентациите поради тоа мораа да ги менуваат дестинациите, ние игравме во Букурешт и во Амстердам. Меѓутоа за разлика од некои други селекции ние не патувавме премногу игравме два дуели во Букурешт, па третиот во Амстердам.

Репрезентацијата која помина најмногу километри досега на шампионатот е Швајцарија, тие прелетале 12.000 километри. Играа во Баку, Рим па повторно во Баку, сега се во Букурешт каде што ќе играат со Франција.
Велс е зад нив со 8.000 километри, играа во Баку и Рим, а осминафиналето ќе го играат во Амстердам. Шведска следува со нешто под 8.000 километри (играа во Севиља и Ст.Петерзбург), а сега со Украина ќе се сретнат во Глазгов.

Единствената репрезентација која не патуваше никаде е Англија. „Гордиот Албион“ сите три дуели ги одигра на „Вембли“, каде што ќе го играат и осминафиналето против Германија.