Хит остана во живот, Батлер беше сензационален

Мајами Хит остана во игра за титулата во НБА лигата. Во третиот натпревар од големото финале тимот од Флорида го победи ЛА Лејкерс со 115:104 и така намали на 2:1 во серијата.

Хит потполно заслужено стигна до првата победа во големото финале. Имаа водство од почетокот на натпреварот, а на стартот од третата четвртина имаа и максимални +14 (68:54).

Меѓутоа, Лејкерс се врати и успеа да намали на 89:91 на стартот од последната четвртина, но Хит успеа да се врати со одлична игра во финишот и дојде до двоцифрена предност за конечни 115:104.

Натпреварот на кариерата го одигра Џими Батлер кој оствари трипл дабл со 40 поени, 11 скокови и 13 асистенции.

На другата страна стандардно најдобар беше Леброн Џејмс со 25 поени и 10 скокови.