Јувентус се засилува со турски репрезентативец

Јувентус ова лето сака да ја подмлади дефанзивната линија, а италијанските медиуми пренесуваат дека „старата дама“ е блиску до трансфер на младиот турски репрезентативец Мерих Демирел.

Демирел пролетниот дел од сезоната го помина во Сасуоло на позајмица од Аланиаспор и се покажа во одлично светло.

Овој 21-годишен дефанзивец во Серија А одигра 13 меча во дресот на Сасуоло, а против Киево успеа да се запише и во листата на стрелците.

Италијанските медиуми пренесуваат дека Јувентус веќе ги започнал преговорите и е блиску до комплетирање на трансферот.

Потписот на Демирел ќе ги чини „бјанконерите“ 15 милиони евра, но се уште не е јасно дали турскиот репрезентативец веднаш ќе се пресели во Торино или ќе остане во Сасуоло уште една година на позајмица.

„Газета дело Спорт“ исто така ја потврди веста и додаде дека Јувентус веќе договорил петгодишна соработка со менаџерите на Демирел.