Ангеловски задоволен од жребот: Добивме израмнета група!

Фудбалската репрезентација на Македонија, попладнево ги доби противниците во квалификациите за Европското првенство во 2020 година.

Македонија ќе игра во Групата Г заедно со репрезентациите на Полска, Австрија, Израел, Словенија и Летонија.

Селекторот Ангеловски е задоволен од ждребот бидејќи, како што вели, групата е израмнета.

„Добивме група во која се наоѓаат релативно израмнети репрезентации. Македонија влегува со нескриени амбиции, а притоа респектирајќи ги сите противници. Не стравуваме од никого и може да се спротивставиме на сите противници, само сплотено, тимски и со огромна поддршка од јавноста. Ние ќе одиме од натпревар во натпревар и се надевам дека ќе стигнеме до крајната цел, а тоа е пласман на Европското првенство“, изјави Ангеловски.

Натпреварите ќе се играат во периодот помеѓу март и ноември 2019 година, а првопласираните две репрезентации ќе обезбедат пласман на ЕУРО 2020.