Толку од трпението на Берлускони и Галијани: Монца има нов тренер

Италијанскиот клуб Монца денес го отпушти тренерот Џовани Стропа поради лошите резултати и на негово место го постави Рафаеле Паладино.

Стропа ја предводеше Монца во минатата сезона кога клубот стигна до најдобриот резултат во својата историја и се пласираше во Серија А, но екипата после шест кола во најсилното италијанско првенство има само еден бод кој го свои за викендот против Лече.

Клубот не прецизираше дали Паладино привремено ќе ја предводи екипата или ќе биде долготрајно решение.

Дебито на клупата на Монца ќе го има против Јувентус во недела. Тоа е клуб за кој одигра повеќе од 50 натпревари пред во 2008 година да премине во Џенова.

Смената на Стропа е втора тренерска смена во Серија А откако Болоња на местото на Синиша Михајловиќ го доведе Тијаго Мота. Ќе потсетиме, Монца е предводена од тандемот од славните денови на Милан Берлускони-Галијани.