Тодоров: Повеќе од 18 минути водевме со првиот тим на ФИБА ранкингот, оваа група има светла иднина!

Репрезентацијата на Македонија денес одигра добар натпревар, но на крајот сепак загуби од фаворитот Италија со 92:84.

Македонија од почетокот до крајот на мечот беше рамноправен противник на Италијанците, блескаше Ненад Димитријевиќ кој постигна 24 поени и подели 12 асистенции. Во добар дел од натпреварот и ние бевме репрезентацијата која беше во водство.

Селекторот Александар Тодоров после натпреварот искажа задоволство.

„Покажавме дека можеме да играме против тим кој е прв на ранкингот на ФИБА во моментов. Успеавме не само да бидеме рамноправни, туку и да водиме повеќе од 18 минути од мечот. Покажавме тотално поинакво лице во однос на натпреварите лани.

„Ова е група која како тим има светла иднина и група на која сум исклучително горд. Ни претстојат уште три натпревари кои ќе бидат многу тешки, но на крајот најверојатно се ќе се сведе на мечот со Естонија в понеделник“.

Димитријевиќ и Вајли функционираа како одличен тандем.

„Лесно е кога имаш такви кошаркари. Двајцата знаат да играат кошарка и нема проблем да се поврзат заедно. Добро е што имаме уште два меча пред дуелот со Естонија, така што ќе имаат доволно време да се воиграат“, изјави Тодоров.