Сликата на модерниот фудбал: Влаховиќ блесна, Фиорентина му одреди „луда“ цена

Српскиот напаѓач Душан Влаховиќ оваа сезона прикажува фантастични настапи во дресот на Фиорентина.

Влаховиќ оваа сезона успеа да се избори за место во стартниот тим, а својата шанса и тоа како знаеше да ја искористи. Овој 21 годишен напаѓач во досегашниот дел од сезоната одигра 37 натпревари и постигна 21 гол во сите натпреварувања со што го привлече вниманието на себе на повеќе европски клубови.

Веќе некое време се шпекулира дека Влаховиќ на крајот од сезоната ќе ја напушти Фиорентина, но јасно е дека клубот од Фиренца нема така лесно да го пушти.

„Газета дело Спорт“ објави дека Милан, Рома и Јувентус покажале најголем интерес за Влаховиќ и дека ќе се обидат да го доведат на крајот на оваа сезона. Влаховиќ со Фиорентина има договор до летото 2023 година и беше прогласен за еден од најпреспективните напаѓачи во Европа.

Во Фиорентина се свесни дека тешко ќе го задржат Влаховиќ во своите редови и сакаат да извлечат што е можно повеќе пари за неговиот трансфер. „Газета“ денес објави дека челниците на Фиорентина одредиле цена за овој 21 годишен напаѓач и дека Влаховиќ може да го напушти клубот ако некој за него плати 80 милиони евра.

Сигурно дека и покрај денешните цени во фудбалот ова е изненадување, а ќе видиме дали некој од заинтересирани ќе се реши да плати ваква сума.