Разочарување за Србија: Талентот на Баерн ќе игра за Германија

Александар Павловиќ, одличниот фудбалер за врска на Баерн Минхен, изгледа нема да избере да настапува за репрезентацијата на Србија, откако доби повик за А селекцијата на Германија.

Последните денови се шпекулираше дека Павловиќ се уште размислува за својот избор и ќе одлучи по Европското првенство кое следува, но сега германските медиуми пренесуваат разочарувачки вести за нашиот сосед. “Билд” објави дека Павловиќ ќе биде вклучен во селекцијата на Нагелсман за мартовските натпревари, што значи дека ќе ја одбие поканата од Србија.

Талентот од Баерн Минхен бил повикан во германскиот тим како замена за повредениот Леон Горецка и може да дебитира за А тимот на Германија на пријателските натпревари против Франција и Холандија.

“Моменталната ситуација е таква што Александар Павловиќ ќе биде повикан во германскиот национален тим овој месец за пријателските натпревари против Франција и Холандија. Причините за неговото повикување вклучуваат неговите извонредни настапи за Баерн, како и тоа што Србија се обидува да го убеди со вклучување во тимот на Европското првенство кое ќе се игра ова лето”, стои во текстот на “Билд”.

Младиот играч за врска има 19 години и се смета за еден од играчите со најголем потенцијал на својата позиција. Павловиќ оваа сезона одигра 17 натпревари за Баерн, постигна два гола и запиша две асистенции, а за него се предвидуваат големи успеси.