ПАТОТ ЗА МУНДИЈАЛОТ: Осум репрезентации веќе се на СП, уште десет на чекор до Русија

Завршен е нов круг од квалификациите за Светското првенство.

Во изминативе неколку дена се одиграа квалификациите за Светското првенство 2018. година, а по сите натпревари имаме неколку нови патници во Русија и уште неколку други репрезентации кои обезбедија најмалку дополнителни квалификации за СП.

Во моментов имаме 8 сигурни патници во Русија, со домаќинот, тука се и Бразил, Белгија, Мексико и четири репрезентации од Азија: Иран, Јапонија, Јужна Кореја и Саудиска Арабија.

Азиските квалификации се завршени, а јасно е кои репрезентации ќе се најдат во дополнителните, интерконтинентални квалификации. За тоа место се борат Сирија и Австралија, а победникот од нивниот меѓусебен дуел ќе игра против четвртопласираната репрезентација од квалификациите на Северна и Средна Америка (КОНКАКАФ).

Во интерконтиненталните квалификации, се наоѓа и Нов Зеланд, чекајќи ја петатапласирана репрезентација од Јужна Америка, а на таа позиција во моментов е Аргентина.

Кога станува збор за европските квалификации, освен Белгија, нема ниту една репрезентација која го обезбеди патот за Русија, но Швајцарија, Португалија, Германија и Шпанија во најмала рака обезбедија второ место и дополнителни квалификации. Под второто место не можат да бидат Северна Ирска и Србија, но се уште не обезбедија најмалку дополнителни квалификации.

Последната репрезентација која обезбеди барем дополнителни квалификации е Костарија, која не може да биде под четвртото место во КОНКАКАФ.