Од осум негатива до бод со гол во псоледните секунди – по голема драма реми за Е.Пелистер во Швајцарија!

Eурофарм Пелистер одигра одличен меч на гостувањето кај Кадетен Шафхаузен.

Битолскиот тим губеше со осум разлика, а на крајот успеа да се врати во мечот и со голот на Јосип Периќ да дојде до реми 28:28. На полувреме домаќинот водеше со 16:11.

Во првото полувреме македонскиот тим беше под нивото, но потоа успеа да пронајде мотив и да дојде до првиот бод сезоната во Европската лига. Херојот Периќ беше прв стрелец со шест гола, Мандаланиќ и Маркоски постигнаа по четири.

Колку очајно беше отварањето на Е.Пелистер покажува тоа што дури во деветтата минута од натпреварот го постигнаа првиот гол, тогаш Обрадовиќ намали на 5:1. Домаќинот имаше потоа и 13:4 и 16:6, сепак до крајот на полувремето момците на Бабиќ намалија на 16:11.

Второто полувреме донесе далеку подобра игра на Битолчани. Иако прво повторно Кадетен се одлепи на осум разлика 20:12, сепак потоа следуваше серија од 1:6 со која македонскиот тим намали на 21:18.

Клучни беа последните две минтуи кога Кадетен остана со играч помалку, тука прво Маркоски намали на 28:27. Во последните секунди со звукот на сирената Јосип Периќ успеа да погоди за конечни 28:28.