И да ја донесе Италија на Мундијал Вентура сигурно „лета“

Италијанците сакаат да го сменат селекторот дури и ако ги однесе на Мундијалот? Вечерашното издание на „La Stampe“ и „Gazetta delo Sport“ покажува дека столицата на искусниот стратег е несигурна, и не само тоа, споменатите весници ја донесуваат листата на кандидати за негов наследник.

Имено, италијанската фудбалска јавност беше незадоволна од Азурите од овие квалификации, а ситуацијата дополнително се влоши по поразод од Шведска во првиот натпревар од баражот.

Наводно, три имиња се можни наследници на Џанпјеро Вентура. Еден од нив, и најмалку можна опција е Антонио Конте, за кого се пишува дека не е во најдобри односи со управата на Челзи, и дека би можело да се врати на клупата на националниот тим. Иако во овој момент тоа делува незамисливо. Се споменува и Карло Анчелоти кој е слободен по заминувањето од Баерн. „Gazetta“ потсетува дека Карло најавил дека ќе се одмори се до стартот на следната сезона, но некои извори тврдат дека би можел да се предомисли.

И на крајот тука е Џиџи ди Биаџо, најверојатниот избор доколку Вентура добие отказ. Весниците пишуваат дека селекторот на младата репрезентација на Италија има поддршка во Сојузот, и на луѓето им се допаѓа неговиот систем 4-3-3 што го форсира и дека би сакале да го видат во сениорскиот тим.