Дерби на денот: Милан за продолжување на сонот, Ливерпул за престиж

Милан е доаќин на Ливерпул во еден од дуелите кои привлекуваат најголемо внимание во рамки на Лигата на Шампиони. Се игра последното коло во кое влогот е голем, а притисокот уште поголем.

Ливерпул има за цел да дојде до шест победи од шест меча во Лигата на шампионите без разлика што овој меч за нив нема буквално никаква важност, освен секако престижот. Тимот на Јирген Клоп веќе е сигурен на првото место и уште пред минатото коло имаше обезбедено пласман во осминафиналето, додека Росонерите имаат жестока битка за второто место во групата Б.

Милан сонува за победа

Среде падот на формата во Серија А, Милан отпатува на Ванда Метрополитано за да се соочи со Атлетико Мадрид на претпоследниот натпревар во групата Б, со цел да остане во игра за пласман во следната фаза. Реално, речиси сите го отпишаа пред тоа гостување, но Милан славеше победа од 0:1 сосема заслужено и си обезбеди битка за пласман на второто место.

Тоа може да се покаже како клучна победа на Милан во Европа, без разлика што во моментов Порто е на второто место со бод повеќе од Атлетико и Милан. Има многу комбинации во оваа група, но за Росонерите едно е сигурно – им треба победа против Ливерпул.

Нивната судбина е надвор од нивни раце, но победа на Сан Сиро заедно со реми на мечот Порто – Атлетико, или со победа на шпанскиот тим ќе им донесе на избраниците на Стефано Пиоли место во осминафиналето.

Пред овој меч Милан се врати на победите и во Серија А, па славеше над Џенова и Салернитана во последните два меча како увертира пред овој важен дуел.

Ниту еден гостински тим не можеше да ја зачува мрежата на теренот на Сан Сиро оваа сезона и нема да има подобро време Милан да ја забележи својата прва победа во Лигата на шампионите на домашен терен од септември 2013 година, особено кога Ливерпул игра само за гордост.

Ливерпул ќе игра за гордост

Ливерпул повторно игра одлична сезона. Тимот на Клоп има само еден пораз сезонава и тоа оној од Вест Хем, а сето останато се победи и ремија. Имаат голема битка со Сити и Челзи и Премиер Лигата и ќе имаат тешка задача да дојдат до титулата, но веќе обезбедениот пласман во следната фаза од Лигата на Шампиони му донесе многу простор на Клоп.

Следува еден навистина тежок период за Ливерпул, за сите екипи во Англија пред онаа Боксинг деј програма, пред новогодишната фудббалска програма каде многу често се добивале или губеле титули. Од голема важност ќе биде свежината на фудбалерите, па Клоп уште од сега има можност за ротации.

Овој меч во Милано нема важност за нив. Како што веќе кажавме, Ливерпул игра само за гордост и јасно е дека некои од клучните фудбалери ќе одмараат. Англиските медиуми шпекулираат со составот на Ливерпул, но ништо околу првите 11 нема да биде јасно до почетокот на мечот. Во секој случај, Ливерпул нема со најсилен состав да излезе на Сан Сиро.