Гери Невил за ѕвездата на Манчестер Јунајтед: Жал ми е за него

Манчестер Јунајтед ја заврши сезоната во Премиер лигата на осмото место со 60 бодови, 31 помалку од шампионот и градски ривал Манчестер Сити.

Во Лигата на шампионите веќе беше елиминиран во групата, а пред летната пауза го чека финалето на ФА Купот со Сити.

Јунајтед на тој начин ја продолжи серијата разочарувачки сезони по заминувањето на легендарниот менаџер Сер Алекс Фергусон.

Гери Невил, поранешниот дефанзивец на Јунајтед и поранешен англиски репрезентативец, денес стручен коментатор, истакна дека му е жал за еден играч од тимот на тренерот Ерик Тен Хаг, а тоа е данскиот напаѓач Расмус Хојлунд (21).

Да потсетиме, Хојлунд минатото лето пристигна во Јунајтед од Аталанта за 73,9 милиони евра.

Досега има одиграно 42 натпревари на кои постигна 16 и асистираше за два гола.

„Жал ми е за Хојлунд. Разговаравме за тешкотиите што Јунајтед ги имаше во однос на бековската четворка, но истото важи и за нападот. Хојлунд не знае каков е планот, дали крилниот напаѓач ќе тргне по линијата или ќе влезе во средината. Се гледа дека тргнува добро, по што крилниот напаѓач влегува во средината и започнува серија од 15 додавања.

Вториот пат се повлече и се обиде да се вклучи во акцијата, но тогаш крилниот напаѓач отиде до линијата и нафрли. Додека Јунајтед нема константен план за игра, главниот напаѓач ќе има невозможна задача“, анализира Невил, пренесува Дејли Мејл.