„Ако останеше Југославија ќе се бореше за европските и светските титули“

Легендарниот хрватски фудбалер Роберт Просинечки е еден од најдобрите од овие простори.

Како член на Црвена Звезда освои се што можеше да освои, репрезентативец на екс – СФРЈ со која стигна до ¼ финалето на Светското првенство во Италија во 1990 година. Познат е и потоа што е еден од малкумината кои играле и за Реал Мадрид и за Барселона.

Во едно интервју за „АС“ тој помеѓу другото зборуваше и за репрезентацијата на неговата генерација на Југославија. Ќе потсетиме тој со младинската селекција на Југославија стана светски шампион во 1987 година.

„Тој тим кој истрча во Чиле се спремаше четири години. Лигата во Југославија беше многу силна во тоа време, не можевме да одиме надвор додека не наполневме 25 години. Немаше странци и тоа беше причина што се појавуваа млади фантастични играчи. Не сакам да зборувам за минатото, но едно знам ако таа наша генерација останеше заедно Југославија ќе се бореше за европските и светските титули“, изјави Просинечки.