Роберт Просинечки повеќе не ја води фудбалската репрезентација на Киргистан. Киргискиот фудбалски сојуз објави дека соработката е прекината со заедничка согласност. “Киргискиот фудбалски сојуз му изразува благодарност на Роберт Просинечки за неговата работа, придонесот кон развојот на националната репрезентација и професионализмот”, велат од сојузот.
Според порталот Евразија Фудбал, до прекинот дошло бидејќи Киргискиот фудбалски сојуз сакал да направи измени во одредени точки и услови во договорот на Просинечки. Хрватскиот стручњак не се согласил на ова, па прекинот бил договорен.
Просинечки го презеде Киргистан во декември минатата година, но не учествуваше со тимот во ниту еден официјален натпревар. Водеше четири пријателски меча и постигна два нерешени исхода против Палестина, и порази од Екваторијална Гвинеја и Мадагаскар.
Киргистан е четвртото селекторско искуство за Просинечки. Претходно ги водеше Азербејџан, Босна и Херцеговина и Црна Гора. На клупско ниво, бил тренер на Црвена звезда, Кајсериспор, Денизлиспор, Олимпија Љубљана и Рудеш.
Учество во игри на среќа е дозволено за лица со 18+ години. Играј одговорно!