Тренерот на Ајакс: Како го победив Реал?

„Ова е историска победа која е важна за сите нас. Беше незамисливо дека ова ќе се случи, никој не веруваше во тоа.“ – изјави Тен Хаг и откри како го надмудрил Солари.

„Планот беше едноставен. Сакавме да создадеме контрола над топката и така да го спречиме Реал да ја постави својата игра. Одигравме добро во транзиција, а играта во дефанзива беше одлична. Апсолутно сите момци одиграа фантастично. Среќен сум за нашиот клуб, но и за холандскиот фудбал за ова што се случи.“

Ова е најголемата победа во неговата кариера и нема дилеми дека на овој триумф ќе се сеќава додека е жив.

„Едноставно, на ваквите моменти мора да се сеќавате и да уживате во нив. Имаме шанси да освоиме три трофеи, играме добра сезона, но наградите не доаѓаат до самиот крај.“ – истакна Тен Хаг и додаде:

„Сакаме да ги достигнеме сите наши цели. Мораме да ги поставиме целите уште повисоко и да продолжиме да напредуваме. Би сакал да ги задржиме сите наши играчи во клубот, но тоа е во доменот на фантазијата.“ – изјави тренерот на великанот од Амстердам.

Ајакс сега го чека ривалот за четвртфиналето во Лига на шампиони, а неговото име ќе го дознае за 10 дена.