Пике: Прв пат се чувствувам инфериорно во однос на Реал

Дефанзивецот на Барселона, Жерар Пике после поразот во Суперкупот од Реал призна дека работите во Шпанија се промениле пред почетокот на новата сезона.

„Кралскиот“ клуб до трофејот дојде супериорно со две победи и вкупни 5:1, а Пике го призна она што беше очигледно – дека Реал е моментално подобар.

„Мислевме дека ќе играат со двајца напаѓачи, не со тројца, како на првиот натпревар. Не притискаа, беа подобри од почетокот и тоа го одреди ритамот на мечот. Ова не е најдобриот период за нас како тим и како клуб. Мораме да се консолидираме и да се вратиме“, истакна Пике.

„Мораме да го признаеме поразот и да кажеме дека Реал е подобар од нас. Сезоната е долга и има простор за напредок. За девет години, колку што сум овде, прв пат се чувствувам инфериорно во однос на Реал. Вистина е дека ја освоија ЛШ, но и ние го направивме тоа не толку одамна“, заклучи Пике.