Интер има „пеколен“ план и сака да ја прекине доминацијата на Јувентус!

Поранешниот спортски директор на „старата дама“ и архитект на овој Јувентус, Бепе Марота е пред промоција во Интер, а целта е само една – да се симнат „бјанконерите“ од тронот.

Марота моментално е во Кина на средба со челниците на Сунинг, каде детално ќе биде разработен планот со цел создавање на тим кој ќе се бори за Скудето и ќе биде сериозен фактор во Лигата на шампиони.

Интер на лето ќе се ослободи од стегите на Финансискиот фер-плеј и сопствениците се спремни да вложат значителна сума, бидејќи сметаат дека наскоро може да се прекине доминацијата на Јувентус во Италија.

„Газета дело Спорт“ открива детали и имиња на ѕвезди кои би требало да пристигнат на „Џузепе Меаца“. Имено, Марота сакаше ова лето да го донесе Милинковиќ-Савиќ во Јувентус, наводно веќе има договор со неговиот агент и ова лето ќе го донесе Србинот во Интер. Истиот принцип ќе биде искористен и за ѕвездата на Каљари, Николо Барела.

Марота наводно добил „зелено светло“ да работи на доведување на две големи ѕвезди, а станува збор за Лука Модриќ од Реал Мадрид и Марсијал. „Нероаѕурите“ нема да жалаат пари да ги донесат овие двајца фудбалери на „Џузепе Меаца“ и сметаат дека со сите овие засилувања и еден искусен дефанзивец како Вертонген ќе имаат „дрим-тим“ со кој ќе стават крај на доминацијата на Јувентус.