Taжна вест од Италија: Почина еден од најважните луѓе во историјата на Милан

Во вторник наутро, на 91-годишна возраст, почина Џузепе Фарина, познат како Ѓуси – претприемач од Венеција кој во седумдесеттите и осумдесеттите години бил претседател и сопственик на фудбалските клубови Падова, Виченца и Милан, кој во 1986 година го продал на Силвио Берлускони.

Под неговото водство, Виченца во 1978 година заврши како второпласирана во Серија А, а токму тогаш се истакна младиот напаѓач Паоло Роси, кој подоцна освои Златна топка и титула светски првак во 1982 година. Сепак, Фарина најмногу е познат по турбулентните години поминати на чело на Милан: клубот го купи во јануари 1982 година, а веќе таа сезона Милан испадна во Серија Б по втор пат во својата историја, откако прв пат испадна во 1980 поради скандал со обложување.

Веќе следната сезона Милан се врати во Серија А, но во наредните години не успеа да оствари поголеми успеси, а најдобар пласман беше петтото место. Во февруари 1986 година, Фарина го продаде клубот на Силвио Берлускони, во моментот кога Милан беше во тешка финансиска состојба и пред банкрот. Во текот на неговиот мандат, својот деби го забележа и младиот Паоло Малдини, кој подоцна стана легенда и капитен на Милан.