Синер по суспензијата: Преземав одговорност за постапките на мојот тим

Голема вест во светот на спортот оваа сабота е тримесечната суспензија на првиот рекет Јаник Синер поради два позитивни теста на клостебол од минатата година, што предизвика допинг скандал.

Светската антидопинг агенција (ВАДА) бараше двегодишна суспензија за 23-годишниот Италијанец, но го прифати објаснувањето на освојувачот на три Гренд Слем турнири кој тврдеше дека „немал намера да мами“, дека „тој лек не го подобрил неговиот настап на теренот“, и дека „сето тоа било резултат на небрежност на неговите соработници и дека немал никакво знаење за тоа“.

„Овој случај ми висеше над главата речиси година дена, а долгогодишниот процес требаше да биде завршен со одлука, можеби, до крајот на годинава. Секогаш сум ја преземал одговорноста за мојот тим и ги разбирам строгите правила на ВАДА, кои се значајна заштита на спортот кој го сакам. Врз основа на тоа ја прифаќам понудата на ВАДА да се реши овој случај со тримесечна санкција“, објасни Синер.