Откриени тажни детали за состојбата на легендарниот Михаел Шумахер

Феликс Горнер, новинарот на германскиот „РТЛ“ и еден од најдобрите познавачи на состојбата на легендарниот возач на Формула 1, Михаел Шумахер, сподели најнови информации кои, за жал, се многу загрижувачки.

Горнер, кој со години внимателно следи сè што се однесува на седумкратниот шампион, истакна дека Шумахер е во исклучително тешка здравствена состојба и дека е целосно зависен од туѓа нега, а дополнително загрижува што повеќе не може да се изразува со говор.

– Ситуацијата е многу тажна. На Михаел му е потребна постојана нега и е потполно зависен од своите негуватели. За жал, повеќе не може ни да зборува, изјави Горнер во интервју за германските медиуми.

Легендарниот возач на Формула 1 сè уште е во семејно опкружување, а семејството е максимално затворено кон јавноста кога се однесува на детали за неговата здравствена состојба. Само 20 луѓе имаат пристап до Шумахер.

– Семејството и понатаму цврсто ја чува неговата приватност и тоа е исправно. Така секогаш се однесувале и тоа не се променило. Се водат според тоа што би било во најдобар интерес на Михаел, додаде Горнер.