Од Манчестер Јунајтед подготвуваат трета понуда за Мбемо, се очекува зделката да биде завршена оваа недела

Раководството на Манчестер Јунајтед подготвува трета официјална понуда кон Брентфорд за Брајан Мбемо, објавуваат голем број авторитетни извори во Англија.

До овој момент од „Олд Трафорд“ испратија две понуди, но секоја од нив беше одбиена. Сепак, двете страни продолжуваат со многу интензивни преговори, а очекувањата се новата понуда да биде со вкупна вредност од околу 65 милиони фунти и да биде прифатена од „пчелките“, бидејќи во последните денови беа дискутирани токму структурата на плаќањата и големината на бонусите.

Од Манчестер Јунајтед го направија токму Брајан Мбемо главна трансферна цел во овој момент и се надеваат дека ќе успеат да ја завршат зделката до крајот на неделата, за да може играчот да започне подготовките со тимот. Фудбалерите на Рубен Аморим треба да се јават за прва тренинг-сесија во понеделник на седми јули. Во исто време од Брентфорд испратија јасна порака во последните денови преку нивниот спортски директор Фил Џајлс, дека Мбемо ќе замине само под услови кои ќе ги задоволат Лондонците и поинаку би можел да остане на „Бренфорд Комјунити Стадион“.