Не е се во парите: Македонски репрезентативец одбил понуда од големата Барселона!

Американскиот плејмејкер со македонски пасош, Ти-Џеј Шортс, игра во неверојатна форма и важи за еден од највлијателните кошаркари на европската сцена оваа сезона. Во дресот на Париз, Шортс не само што ги оправда, туку и ги надмина сите очекувања, водејќи го тимот кон историја и обезбедување пласман во плеј-офот на Евролигата.

Францускиот состав, предводен од Шортс, ќе се соочи со моќниот Фенербахче во елиминациската фаза, а сето тоа благодарение на визијата, брзината и прецизната организација на играта што тој ја носи на теренот. Неговите настапи редовно се препознаваат со индивидуални признанија – неколку пати беше прогласен за МВП на колото, а најновото признание е вклучувањето во идеалната петорка на сезоната во Евролигата.

Таквата форма, секако, не остана незабележана. Според информациите на Планета Баскет, големиот Барселона му испратил конкретна понуда – договор вреден 2,5 милиони евра по сезона. Каталонците се подготвени да инвестираат сериозни средства за да го доведат во својот состав, но Шортс ги изненади сите со својот одговор.

И покрај привлечната финансиска понуда и блескавата репутација на шпанскиот гигант, Шортс решил да остане фокусиран на моменталните цели со Париз. Со тоа испрати јасна порака – резултатите и успехот на тимот се приоритет број еден, а трансферите ќе почекаат.