Лудо: ФИФА дополнително ги зголеми цените на билетите, сега се продаваат и по 33.000 долари!

ФИФА ја зголеми цената на најскапите билети за финалниот натпревар на Светското првенство на 19 јули на стадионот МетЛајф во Ист Рутерфорд, кои сега чинат неверојатни 32,970 долари.

На официјалната страница за продажба на ФИФА овие седишта се обележани како категорија еден. Претходно, највисоката цена за истата категорија изнесуваше 10,990 долари, а оваа опција во четвртокот навечер беше достапна само за лица со инвалидност и билети со олеснет пристап.

Високите цени ги следат и завршниците на турнирот. Билетите за полуфиналето на 14 јули на стадионот AT&T во Арлингтон беа ценети на 11,130, 4,330, 3,710 и 2,705 долари, додека за второто полуфинале следниот ден на стадионот Мерцедес-Бенц во Атланта беа понудени по цени од 10,635, 3,545 и 2,725 долари.

Скапо беа наплатени и натпреварите на репрезентацијата на САД во групната фаза.

За дуелот со Парагвај на 12 јуни на стадионот Софи во Инглвуд, цените беа 2,735, 1,940 и 1,120 долари, за натпреварот против Австралија на 19 јуни во Сиетел 2,715 долари, а за средбата со Турција на 25 јуни во Инглвуд 2,970, 1,345, 990 и 840 долари.

Претседателот на ФИФА, Џани Инфантино, ја бранеше оваа политика на конференцијата на Милкен Институтот Глобал во Беверли Хилс. Тој изјави: “Треба да го следиме пазарот. Се наоѓаме на пазарот каде што забавата е најразвиена во светот, па мораме да применуваме пазарни цени.”

Тој додаде дека препродажбата дополнително ги зголемува цените на вторичниот пазар: “Ако билетите се продаваат по прениска цена, ќе бидат препродадени по многу повисока цена.”

На платформата на ФИФА за препродажба, билетите за финалето во четвртокот се нудеа од 8,970 до неверојатни 11,499,998.85 долари. ФИФА не ги одредува цените што се бараат на оваа платформа, но зема провизија од 15 проценти од купувачот и уште 15 проценти од продавачот.