Линекер Роналдо ме избриша од Инстаграм кога кажав дека Меси е подобар

Англиската фудбалска легенда Гери Линекер сподели дека Кристијано Роналдо го отстранил од листата на следачи на Инстаграм откако изразил мислење дека Лионел Меси е подобар фудбалер. Овој интересен момент го сподели во својот подкаст.

Во епизода од подкастот “The Rest Is Football”, што го води заедно со други поранешни англиски фудбалери, Алан Ширер и Мика Ричардс, Линекер ги објасни причините зошто мисли дека Роналдо не му е наклонет. “Кристијано не ми е баш приврзаник. Тој ме отстрани од следачите на Инстаграм бидејќи сметам дека Меси е во целина подобар фудбалер,” изјави Линекер.

Ставот на Линекер не е изненадувачки, имајќи предвид дека во минатото беше напаѓач на Барселона и многупати јавно ги изразуваше своите симпатии кон Меси. Сепак, Линекер секогаш истакнува и голема почит кон кариерата и работната етика на Кристијано Роналдо.

Гери Линекер се смета за еден од најголемите напаѓачи на Англија и е вистинска легенда на репрезентацијата, постигнувајќи 48 гола во 80 натпревари. На Светското првенство 1986 година ја освои Златната копачка како најдобар стрелец на шампионатот, а по завршувањето на својата играчка кариера стана еден од најпрепознатливите телевизиски лица во британскиот спорт, познат како долгодишен водител на емисијата „Match of the Day“ на „Би-Би-Си“.