Леклер: Во Монца сфатив што значи да бидеш дел од Ферари

Младиот возач Шарл Леклер минатата сезона доби шанса во Ферари и ја искористи максимално.

Леклер имаше неколку одлични изданија во својата деби сезона за Ферари и успеа да го засени својот тимски колега Себастијан Фетел. Младиот возач ја оствари својата деби победа во Монца која е заштитен знак на неговиот тим.

Тој призна дека одлично се чувствува во Ферари и после победата во Монца почуствувал колку таа му значи на овој тим. На крајот Леклер во конечниот пласман кај возачите заврши на четвртата позиција и успеа да го помине Фетел.

„Во Монца беше одлично. Многу е тешко тоа да се опише бидејќи имавме огромен притисок. Ја возевме домашната стаза на која долго се чекаше победа на Ферари и на никој во екипата не му беше лесно. Се ежам кога помислам на таа трка бидејќи таму сфатив што значи да се биде дел од Ферари.“ – изјави Леклер и додаде:

„Го сфатив тоа и порано, но Монца е нешто посебно. Тогаш почувствувате дека сте дел од Ферари и големото семејство на овој тим.“