Италија ќе загуби 1,5 милијарди евра зашто остана без пласман на Мундијалот

Третото последователно неучествување на Италија на Светското првенство не е само удар врз угледот и моралот на италијанскиот фудбал, туку и огромен економски удар. Анализата што ја пренесува италијанскиот печат покажува дека неуспехот во квалификациите ќе има конкретни последици врз економијата и општествената благосостојба, а вкупната штета се проценува на дури 1,5 милијарди евра. Оваа бројка опфаќа сè, од директни финансиски загуби до долгорочни општествени последици, пишува „Калчомеркато“.

Овој неуспех доаѓа во исклучително чувствителен момент за италијанскиот фудбал. Сè уште се свежи сеќавањата на солзите на „Аѕурите“ по поразот од Босна на пенали, како и разочарувањето на генерации млади навивачи кои никогаш не ја виделе својата репрезентација на светската сцена.

Покрај тоа, италијанскиот фудбал го потресуваат и политички конфликти на врвот на Фудбалската федерација на Италија, а неодамна е покрената и истрага против судијата Џанлука Роки поради сомневање за учество во спортска измама.