Со 130 вклучени ученици и 18 обучени наставници, „Допри го голот“ ја заврши едногодишната работа за подостапен фудбал за децата со атипичен развој. На завршниот собир во Скопје беше претставен и прирачник што треба да им помогне на училиштата и клубовите да продолжат со приспособени спортски активности.
Проектот го спроведе ОУРЦ „Иднина“, со средства од Фондацијата на УЕФА за деца. Финансирањето следувало по наградата што ја добил центарот, за која бил предложен од ФФМ. Програмата била насочена кон ученици со аутизам и други сложени образовни потреби, поврзувајќи приспособена опрема, подготовка на кадарот и организирана поддршка од врсници.
Практичната примена веќе имаше свој простор на теренот. Во октомври беа претставени заеднички ревијални фудбалски активности на ученици со типичен и атипичен развој. Наместо натпреварувачки пласман, акцентот бил врз учеството и вложениот труд, за што сите ученици добиле медали.
Прирачникот нуди начини за приспособување на тренинзите, но и вежби за комуникација, соработка во тим и фудбалски вештини. Достапен е на три јазици: македонски, албански и англиски. „Иднина“ го објави во дигитална форма на 8 ноември, а меѓу неговите корисници, покрај наставниците и тренерите, се и специјалните едукатори, рехабилитаторите и образовните асистенти.
На конференцијата беа прикажани документарен филм за проектот и искуства од работата со децата. Следниот чекор е стекнатото знаење да се применува во редовната настава и во фудбалските школи: обуката на наставниците и прирачникот се основата што останува по завршувањето на проектните активности.
Фото: Архива
Учество во игри на среќа е дозволено за лица со 18+ години. Играј одговорно!