Дембеле води трка со времето пред реваншот со Арсенал

Фудбалерите на Пари Сен Жермен го пречекуваат Арсенал во реваншот од полуфиналето на Лигата на шампионите, а кај домашниот тим знак прашање е само околу Осман Дембеле.

Французинот се повреди во првиот натпревар, од тогаш е надвор од теренот, но денес започна да тренира со остатокот од тимот.

Иако уште не е целосно подготвен, во таборот на Парижаните расте оптимизмот, а најважно е што повредата не е од потежок тип, посебно ако се земе предвид неговата претходна историја од Барселона кога често беше отсутен.

Поголеми се шансите Луис Енрике да не ризикува со потешка повреда и Дембеле да остане на клупата и по потреба да влезе и помогне на своите соиграчи.

Доколку Дембеле не биде подготвен да го започне натпреварот, на теренот ќе биде или Бредли Баркола или Гонзало Рамош, додека сигурни се Хвича Кварацхелия и Дезире Дуе.

ПСЖ во првиот натпревар славеше со резултат 1:0 и има голема шанса да стигне до првото финале од 2020 година, кога во борбата за трофејот подобар беше Баерн Минхен.

Натпреварот ПСЖ – Арсенал е закажан за среда во 21:00 часот.

Фото: Принтскрин