Челси на Флорида договори засилување од 65 милиони евра

Борусија Дортмунд и Челси ги завршија преговорите за трансферот на 20-годишниот напаѓач Џејми Гитенс во лондонскиот клуб. Преговорите се одржаа во Форт Лодердејл, Флорида, каде двете екипи се подготвуваат за четвртфиналето на Светското клупско првенство кое се одржува во САД.

На официјалната страница на Борусија се наведува дека останува уште да се договорат финалните детали на трансферот кој според медиумските извештаи е вреден помеѓу 63,8 и 65 милиони евра, сума која Борусија ја бараше за Гитенс.

“Преговорите беа предизвик, но задоволни сме што успеавме да ги задоволиме очекувањата,” изјави спортскиот директор Себастијан Кел и додаде: “Џејми е одличен играч кој ни донесе многу радост. Неговата желба беше да го направи следниот чекор во кариерата во Челси. Му посакуваме сè најдобро и многу успех.”