Баерн подготви понуда тешка 250 милиони евра, тргнаа по новата ѕвезда на светскиот фудбал

Еден од најталентираните европски фудбалери, Флоријан Вирц, би можел ова лето да го напушти Бајер Леверкузен и да премине во редовите на најголемиот ривал – Баерн Минхен – со рекорден трансфер за германскиот фудбал.

Како што пренесуваат бројни германски и европски медиуми, Баерн Минхен подготви понуда која ни Леверкузен, ни Вирц, нема да можат да ја одбијат. Станува збор за вкупно 250 милиони евра – од кои 125 милиони за обештетување, додека другиот дел е наменет за петгодишен договор вреден 25 милиони по сезона.

Доколку овој трансфер се реализира, Флоријан Вирц ќе стане најплатениот фудбалер на Баерн, рамо до рамо со Хари Кејн, а зад себе ќе ги остави и другите ѕвезди како Џамал Мусијала, Џошуа Кимих, Лирој Сане и Серж Гнабри.

Со ова Баерн би го срушил сопствениот рекорд кога станува збор за пристигнувачки трансфери – Англичанецот Хари Кејн беше доведен во 2023 година за 95 милиони евра.