Атлетико Мадрид договори шпански репрезентативец

Атлетико Мадрид го договори пристигнувањето на левиот бек на Бајер Леверкузен Алехандро Грималдо, објавуваат Фабрицио Романо и Матео Морето.

30-годишниот шпански репрезентативец ќе биде купен за сума од околу 23 милиони евра, што ќе биде целосната вредност на трансферот, вклучувајќи и можните бонуси. Веќе е се договорено помеѓу сите три страни, а самиот Грималдо веќе се согласил за договор со „јорганџиите“ до 2029 година со опција за уште една година.

Фудбалерот ги помина последните три сезони во Леверкузен, каде што имаше значаен придонес за освоената титула во Бундеслигата, Купот на Германија и Суперкупот на земјата во 2024 година. Тој има одиграно 145 натпревари со 30 гола и 45 асистенции за „аспирините“, а многу од тие голови беа постигнати со впечатливи удари од слободни удари.

Сега, воспитаникот на Барселона е на Светскиот куп 2026 со репрезентацијата на Шпанија, и за националниот тим има одиграно 14 натпревари. Грималдо не играше во првите два натпревари на „Црвената фурија“ на Светскиот куп.