Тренерите изгласаа: „Ел Команданте“ најдобар, арената „Јане Сандански“ втора „најжешка“ во Европа!

Човекот кој на крајот на изминатата сезона го напушти Вардар и премина во редовите на Пари Сен Жермен, Рул Гонзалес е избран за најдобар во Лигата на шампионите и тоа од страна на неговите колеги.

Секоја година пред почетокот на натпреварите од најсилното европско натпреварување, ЕХФ преку анкети избра најдобар тренер, идеален тим и најдобра арена.

Шпанецот кој во Македонија секогаш ќе остане познат под прекарот „Ел Команданте“ за еден глас го победи стратегот Патрис Канаје кој минатата сезона го одведе Монпелје до трофејот во Лигата на шампионите.

Домот на црвено-црните, „Јане Сандаски“ според гласовите се најде на второто место за најдобра атмосфера, победата во оваа категорија ја однесе арената на која Веспрем ги игра своите натпревари.

Кога во прашање е идеалниот тим, ниту еден актуелен играч на Вардар не доби место, но во тимот беа поранешните вардарци Арпад Штербик кој денес го брани голот на Веспрем и Лука Циндриќ кој го носи дресот на Киелце. Своето деби поради проблемите со повреда во новиот клуб Циндриќ може да го има токму против Вардар.