
Наместо само горчлив спомен од елиминацијата, Ерик Лира од дуелот со Англија понел и дрес од Џуд Белингам, но и комплимент што особено му значел. Мексиканскиот репрезентативец во подкастот „Креативо“ раскажа за необичниот пресврт: пред натпреварот размислувал како со сите средства да го запре противникот, а по последниот свиреж добил признание токму од него.
Англија го совлада Мексико со 3-2 во осминафиналето на Светското првенство во 2026 година, а Белингам постигна два гола. Задачата да го чува фудбалерот на Реал Мадрид ја имал 26-годишниот играч за врска на Круз Азул.
Лира не ја крие почитта кон Англичанецот, кого го вбројува меѓу петте или десетте најдобри фудбалери во светот. Токму затоа, кога дознал кој ќе му биде противник, се подготвувал за исклучително жесток дуел.
„Морам да го изедам. Да го удирам, да го влечам, ако треба и да го плукнам. Не знам што сè ќе му направам“, ги пренесе Лира мислите со кои се мотивирал пред средбата.
На теренот, сепак, не успеал да го оствари замисленото. На прашањата дали го запрел Белингам одговара без изговори: Англичанецот двапати ја погодил мрежата. Притоа нагласува дека одговорноста за поразот не била само негова, туку на целиот тим.
Елиминацијата особено го погодила бидејќи Мексико настапувал пред своите навивачи. Признал дека плачел по натпреварот, но и дека полесно прифаќа пораз кога знае дека дал сè до последниот момент.
Потоа следувала средбата што му го променила споменот за тој тежок ден. Белингам му пришол и му подал рака, а Лира му посакал среќа и му кажал дека се надева оти Англија ќе стане светски првак.
„Одличен играч си и имаш големо срце. Се надевам дека еден ден ќе играш за голем клуб“, му возвратил Белингам, според сведочењето на мексиканскиот репрезентативец.
Двајцата повторно се сретнале подоцна, кога Лира побарал да ги разменат дресовите. Белингам прифатил, па Мексиканецот си заминал и со неговиот дрес и со зборови што му оставиле силен впечаток.
Лира настапува за Круз Азул. Според мексиканските медиуми, интерес за него покажал Атлас, а во текот на годината имало и контакти со Монако.