Македонската селекција до 17 години ќе продолжи да се бори за настап на Европското првенство во 2027 година. Победата од 1-0 над Сан Марино, заедно со турскиот триумф од 4-0 против Унгарија, им обезбеди на избраниците на Иљами Исејни место во Лига А, уште пред завршниот натпревар од почетната квалификациска рунда.
Одлуката падна во 58. минута, кога Стефан Ристиќ ја искористи асистенцијата на Александар Полимец. Напаѓачот на младинскиот тим на Партизан така стигна до четвртиот погодок на турнирот, а Македонија до втората победа во исто толку настапи.
Ристиќ беше клучен и на отворањето против Унгарија на 11 ноември. Тогаш македонските фудбалери надоместија негатива од два гола за победа од 3-2, со негови погодоци во 55. и 86. минута и во четвртата минута од судиското продолжение. При израмнувањето, додавањето до стрелецот го испрати Матеј Николов.
Пласманот во Лига А, сепак, не значи и обезбеден билет за завршниот турнир. Напредуваат двете најдобри селекции од секоја група во почетниот круг, а напролет во 2027 година во Лига А ќе играат 28 репрезентации, распределени во седум групи. Само победниците во тие групи ќе им се придружат на домаќините од Летонија на ЕП.
Следната задача за Македонија е дуелот со Турција на 17 ноември, на стадионот „Оф Илче“ во рамките на турнирот во Трабзон. Со веќе обезбедено продолжување на квалификациите, тој натпревар ќе го утврди конечниот групен распоред. Европскиот шампионат во Летонија е предвиден за периодот од 24 мај до 6 јуни 2027 година.
Фото: ФФМ
Учество во игри на среќа е дозволено за лица со 18+ години. Играј одговорно!