Генерацијата што го однесе Партизан во Лигата на шампионите повторно се собра, овојпат околу ресторанска маса. Лотар Матеус за време на престојот во Белград вечераше со Саша Илиќ, Игор Дуљај и Ивица Илиев, тројца од фудбалерите со кои го оствари големиот европски успех во 2003 година.
Средбата во ресторан на Автокоманда не помина само во приватно дружење. Германска телевизиска екипа сними материјал за документарен филм, во кој учествуваа и поранешните играчи на црно-белите. Терминот за неговото емитување засега не е познат.
Матеус, кој со години работи како фудбалски аналитичар и консултант во Германија, пристигна во српската престолнина за во петок од трибините да го следи натпреварот меѓу Србија и Германија во Лигата на нации. Посетата му беше можност повторно да се види со дел од своите некогашни избраници.
Разговорите ги вратија 23 години наназад, во сезоната во која Партизан ја освои титулата во Србија и Црна Гора и стигна до групната фаза во Лигата на шампионите. На тој пат белградскиот клуб го елиминира Ѓургарден, а потоа и Њукасл во третото квалификациско коло.
Англискиот состав со Алан Ширер, Џонатан Вудгејт, Нолберто Солано и Кирон Даер не успеа да ја запре екипата на тогаш тренерски неискусниот Матеус. Еден од незаборавните моменти остана пеналот на Миливоје Ќирковиќ во Њукасл, со кој беше потврден пласманот меѓу европската елита.
Покрај тројцата учесници на вечерата, дел од таа генерација беа и Ивица Краљ, Љубинко Друловиќ, Алберт Наѓ, Тарибо Вест, Ненад Ѓорѓевиќ, Андрија Делибашиќ и Митко Стојановски. Белградската средба беше повод Матеус и неговите поранешни фудбалери повторно да ги споделат спомените од еден од најзначајните периоди во историјата на клубот.
Фото: Telegraf
Учество во игри на среќа е дозволено за лица со 18+ години. Играј одговорно!