Спорот предизвикан од коментар на Килијан Мбапе веќе се одрази врз преносите на шпанскиот фудбал во Кина. Државната телевизија CCTV изминатиот викенд не прикажа ниту еден натпревар од Ла Лига, а содржините поврзани со Реал Мадрид беа отстранети и од нејзината апликација.
Повод е интервју во кое францускиот напаѓач зборувал за омилените интернет-мемиња. Меѓу нив издвоил фотомонтажа со неговото лице на телото на, како што го нарекол, „кинески диктатор“. Мбапе не го споменал Мао Це Тунг по име, но на сликата бил прикажан токму поранешниот кинески лидер.
Реакцијата не остана само на телевизиската програма. Неколку кинески компании ги раскинале спонзорските договори, а CCTV престанала да ги емитува и рекламите во кои се појавува фудбалерот.
Според „Марка“, ограничувања вовела и платформата Мигу, ексклузивниот дигитален партнер на Ла Лига во Кина. Таа продолжила со најголемиот дел од преносите, но го повлекла натпреварот на Реал Мадрид. Од понудата биле избришани и постарите видеа со голови и настапи на Мбапе.
Французинот се извини на три јазици — француски, кинески и англиски. Во обид да се надмине спорот се вклучија и неговиот клуб и раководството на шпанското првенство. Претседателот на Ла Лига, Хавиер Тебас, испратил официјално писмо до Кинеската медиумска група, додека Реал во своето извинување нагласил дека има длабока почит кон Кина.
Кинеските власти и државните медиуми потврдиле дека ги добиле дописите. Сепак, сè уште нема одговор дали извинувањата се прифатени, ниту најава кога натпреварите би можеле да се вратат на програмата.
Фото: Index.hr
Учество во игри на среќа е дозволено за лица со 18+ години. Играј одговорно!