Кога Лидс издвои 37 милиони евра за Тарик Мухаремовиќ, дел од навивачите се прашуваа дали клубот презема преголем ризик. Три месеци подоцна, 23-годишниот репрезентативец на Босна и Херцеговина веќе го носи прекарот „Босански ѕид“, а Би-би-си ја отвора темата дали токму тој е најдоброто засилување сезонава во Премиер лигата.
Бројките објаснуваат зошто расположението толку брзо се промени. Во првите осум првенствени средби Лидс прими шест гола, со што само Арсенал имаше поуспешна одбрана. Мухаремовиќ ги одигра сите минути во тој период и беше водечки во лигата по расчистувања со глава.
Неговиот придонес не завршува пред сопствениот гол. На десет настапи во сите натпреварувања забележа еден погодок и две асистенции, наметнувајќи се како еден од најважните играчи во тимот.
Таквиот почеток веќе донесе и приказни за интерес од поголеми клубови. Според Би-би-си, неговите настапи ги следат Барселона, Ливерпул, Баерн Минхен и Интер. Водителот на подкастот на Би-би-си посветен на Лидс, Џони Бакан, посочува дека постои страв оти дефанзивецот би можел да остане само една сезона, иако летос потпиша петгодишен договор.
Мухаремовиќ пристигна од Сасуоло како најскапиот одбранбен фудбалер во историјата на Лидс. Сомнежите околу сумата произлегуваа и од тоа што зад себе имаше само една сезона во најсилните европски лиги. Сега, наместо за цената, на трибините се зборува за неговата цврстина и бескомпромисност.
Поранешниот тренер на Лидс, Сајмон Грејсон, забележал дека врската со публиката почнала да се создава уште на пријателскиот дуел со РБ Лајпциг. Еден силен, но навремен старт на Мухаремовиќ тогаш предизвикал одобрување кај навивачите.
Грејсон особено ги издвојува неговата лева нога и додавањата, како и способноста да се вклопи во одбрана со тројца стопери. Според него, босанскиот репрезентативец има квалитет за најголемите клубови, но во Лидс во моментов се чувствува како дома.
Слична оценка дава и поранешниот англиски репрезентативен голман Пол Робинсон. За него, најсилниот доказ за успешната адаптација е тоа што меѓу навивачите речиси исчезнале разговорите за заминувањето на долгогодишниот стопер Паскал Струјк во Брајтон.
Патот до Англија го водеше Мухаремовиќ низ неколку фудбалски средини. Роден е во Словенија, пораснал во Австрија, а преку Волфсбергер стигнал до Јувентус. Таму тренирал со Леонардо Бонучи и Џорџо Кјелини, за кои претходно истакнал дека многу му помогнале да ги развие одбранбените вештини.
Зборува босански, германски, англиски, италијански и словенечки, а постојана поддршка има од татко му Расим, кој сезонава го следи на секој натпревар на Лидс, вклучително и на гостувањата. Засега, вниманието е насочено кон неговите настапи — токму тие го претворија скапото летно засилување во нов миленик на публиката.
Фото: Index.hr
Учество во игри на среќа е дозволено за лица со 18+ години. Играј одговорно!