Гонсало Рамос во Милан ја добил можноста што му недостигала во Париз – поголема минутажа и слобода да ги покаже своите квалитети. Во разговор за португалскиот Канал 11, напаѓачот откри дека разделбата со ПСЖ ја посакувал уште во јануари, неколку месеци пред да се пресели во Италија.
Незадоволството не било поврзано со атмосферата во соблекувалната, туку со неговата улога во тимот на Луис Енрике. Рамос објасни дека тешко прифаќал да останува надвор од почетниот состав и во периоди кога редовно постигнувал голови.
„Имаше моменти кога погодував на четири или пет натпревари по ред, а ниту еден не го почнував како стартер. Тоа ме фрустрираше, но морав незадоволството да го претворам во мотивација. Никој не може да ги доведе во прашање мојата професионалност, придонесот и решителноста“, истакна Рамос.
ПСЖ не ја прифатил неговата желба за зимско заминување бидејќи ќе морал да бара замена. Сепак, според напаѓачот, Луис Кампос му ветил дека клубот ќе му дозволи да замине во летниот преоден рок.
Трансферот во Милан го направи најскапото засилување во клупската историја. Официјалната сума не беше објавена, а се проценува дека изнесува околу 80 милиони евра.
Во изборот на новата средина улога имал и Рубен Аморим. Португалскиот тренер лично го контактирал откако пристигнал во Милан, додека за интересот и за преговорите Рамос бил во комуникација со Жорж Мендеш за време на Светското првенство. Потврдата дека договорот е завршен ја добил токму од својот агент.
„Сега сум среќен и спокоен. Играм повеќе и клубот ми остава поголем простор да се изразам. Уживаме во фудбалот. Повеќе настапувам и за репрезентацијата, што ми е подеднакво важно и ме прави горд“, порача напаѓачот.
И покрај желбата за промена, разделбата со Париз не му паднала лесно. Посебно ги издвоил односите со тројцата португалски соиграчи со кои поминувал најмногу време. Тие знаеле дека сака да си оди, но на шега го убедувале да остане барем поради дружењето.
Рамос не ја затвора ниту вратата за враќање во Бенфика, каде што ја почна кариерата. Таков чекор би сакал да направи еден ден, откако ќе ги заокружи своите предизвици во странство.
Фото: Bryan Berlin / Wikimedia Commons, CC BY-SA 4.0
Учество во игри на среќа е дозволено за лица со 18+ години. Играј одговорно!