Формула 1 од 2027 година добива многу построга граница меѓу тркачките тимови и нивните оддели за други проекти. ФИА сака да ја затвори можноста знаење и работа платени надвор од буџетскиот лимит незабележано да завршуваат во развојот на болидите.
Новиот пакет, одобрен оваа недела од Светскиот совет за моторспорт, зафаќа 12 страници од оперативниот правилник. Тој не се однесува само на сметководството, туку и на распоредот во фабриките, пристапот до просториите и размената на податоци.
Вработените во Ф1-програмите повеќе нема да смеат да делат канцеларии со колегите ангажирани на проекти надвор од Формула 1. Фабриките ќе мора да имаат физички одвоени зони со електронска контрола на пристапот. Записите за влегувањата ќе се чуваат три години и ќе бидат достапни за проверка од ФИА.
Посебни услови ќе важат за опремата што ја користат двете групи, како воздушни тунели, симулатори и тест-клупи. Пристапот до таквите простории ќе биде ограничен: двете групи нема да смеат да престојуваат во нив истовремено, ниту преку нив да разменуваат информации.
Заедничките мензи, ходници, паркинзи и простории за благосостојба на вработените остануваат достапни за сите. Но, тие нема да смеат да се претворат во места за извршување на основните работни задачи.
Раздвојувањето ќе важи и за компјутерските системи. Ф1-персоналот и останатите оддели нема да имаат пристап до системите на другата страна, а забрането е ограничувањата да се заобиколуваат преку пораки, надворешни дискови, договорни аранжмани или прераспределување на кадарот.
Во ограничени случаи ќе биде дозволен пренос на знаење од Ф1-тимот кон другите делови на компанијата, но не и во обратната насока.
Зад овие мерки стојат долгогодишните сомнежи дека одделите за специјални проекти можат да им помагаат на тркачките екипи, без нивните трошоци да влезат во дозволениот буџет. Такви прекршувања не биле докажани.
Повеќе големи екипи имаат технолошки активности надвор од Формула 1. Ред Бул го има „Адвансд технолоџис“, Мерцедес „Аплајд сајенс“, а Астон Мартин „Перформанс технолоџис“. Ферари работи на јахтата „Хиперсејл“, додека Мекларен претходно го продаде својот оддел „Аплајд сајенс“ на приватна инвестициска група.
ФИА веќе се обиде да ја затвори оваа можност со директивата ТД45 од 2023 година, според која интелектуалната сопственост пренесена од технолошки оддел кон Ф1-тим мора целосно да се пресмета во буџетскиот лимит. Потоа беше утврдено и дека целата плата на секој вработен што придонесува за Ф1-екипата мора да влезе во ограничувањето, наместо само делот припишан на неговиот тркачки ангажман.
Сега контролата оди чекор понатаму: покрај финансиската евиденција, тимовите ќе мора да обезбедат и јасна физичка и дигитална поделба на работата.
Учество во игри на среќа е дозволено за лица со 18+ години. Играј одговорно!