Премиер лигата жестоко за Манчестер Сити: „Ова е најзначајниот дисциплински случај во историјата“

Извршниот директор на Премиер лигата, Ричард Мастерс, даде остар коментар по одлуката на независната комисија во случајот против Манчестер Сити.

Мастерс истакна дека одлуката ги утврдува фактите за случувањата во клубот и дека Сити, според заклучоците на комисијата, систематски ги прекршувал правилата на Премиер лигата во период од речиси една деценија.

„Клучната одлука ги утврдува фактите за она што се случувало во Манчестер Сити во овој период. Таа детално покажува како клубот систематски ги прекршувал правилата на Премиер лигата речиси една деценија“, изјави Мастерс.

Тој додаде дека одлуката ја потврдува и оправданоста на постапката што Премиер лигата ја покрена против клубот.

„Процесот досега беше долг и тежок, но лигата остана решена фактите да бидат независно утврдени.“

Мастерс нагласи дека една од клучните одговорности на Премиер лигата е да обезбеди почитување на правилата што самите клубови ги одобриле.

„Од суштинско значење е лигата да остане конкурентна и фер за сите клубови и навивачи. Оваа улога ја сфаќаме исклучително сериозно.“

На крајот, тој го опиша случајот како „најзначајниот дисциплински случај во историјата на Премиер лигата“, но нагласи дека сè уште има делови од постапката кои треба да бидат решени, вклучително и санкцијата што ќе следува за утврдените прекршоци.

„Сега кога ја имаме одлуката на комисијата, посветени сме на брзо продолжување на преостанатиот процес, за да обезбедиме сигурност за лигата, клубовите и навивачите“, порача Мастерс.